القواطع - درس تاااااانى

حفظ كملف ورد ...

درس تاااااانى

اللى حصل النهارده معايا رجعنى لأيام فاتت، أو بالتحديد ... أيام الشباب الأولى ... كنت وقتها مثل أى شاب بيقرأ كتير قوى، فظن إنه صاحب فكر، مافيش مشكلة إلاَّ ولها عنده حل، ومن الصعب جدا إقناعه، ... بالعربى الفصيح كنت معجب بنفسى فوق ما تتصور، وكلكم عارفين المرحلة المهب ... بلاش ... إذكروا محاسن شبابكم، المهم ... ربنا سبحانه وتعالى أكرمنى كرم مش عارف أقول لكم قد إيه ... فى يوم كنت واقف مع بعض الجيران فى الشارع، وحصلت مشكلة، أو واحد حكى لنا مشكلة وطلب الحل منا ... كلنا حاسينا بالعجز قدام المشكلة دى، إلاَّ واحد منا حل المشكلة بمنتهى البساطة، لحد هنا الأمر عادى ... اللى مش عادى اللى حل المشكلة طفل عمره 10 أو 11 سنة، مش كده وبس، ده مكملش تعليمه ... واشتغل، مش مهم اشتغل إيه، لكن المهم اتعلم إيه، كان واقف مع ناس أصغر ما فيهم ضعف عمره، من اليوم ده، وأنا إتعلمت حاجات كتير أهمها، إنك مش لازم تكون صاحب شهادة عليا علشان تبقى فاهم، أو بتقرأ كتب كتير علشان يتقال عليك فيلسوف، أو يتقال عنك حكيم، لإن ربنا سبحانه وتعالى شبه اللى بيقرأ كتب كتير ومافى حد بيستفيد منه، أو يستفيد هو منها إنه مثل الحمار يحمل أسفاراً... أنا بحكى الحكاية دى ليه؟ لإن الواحد كل ما بيكبر فى السن بينسى، والنهاردة بنتى كررت الدرس تانى، دخلت على هى وأمها، قلت فى نفسى: ياواد ما تسأل مراتك عن السؤال اللى محيرك، يمكن يكون عندها فكرة أو إجابة، قلت لها: شوفى الكلام ده وقولى رأيك فيه، خطفت بنتى الورق منها، وقالت: أنا اللى حاقرأ ... شَاوِرت لأمها علشان تسيبها تقرأ، بدءت تقرأ بصوت عالى علشان تسمع أمها ... فجأة سكتت، بعدين سألتنى: إيه معنى الكلام ده؟ قلت لها: هو إنتى مش فاهمه الكلام اللى قرأتيه؟ ردت بسرعه: لأ ... اللى فات فهماه، أنا بتكلم على اللى جاى، اللى بتقول فيه إن لا خدمة إلا بمرتب أو أجر ... طيب إزاى؟ قلت: إزاى إيه؟ ردت قائلة: هو أنا لما بخدمك أو بخدم ماما علشان مرتب أو أجر؟ ... هنا تذ كرت اللى فات، فقلت بصوت عالى: درس تااااااانى، حسيت إنى رجعت تانى تلميذ ... مش يعدى الموضوع بقى وكفى الله المؤمنين شر القتال ... لأ ... تكمل أمها على، قالت: أنا مش حاتكلم عن اللى بتعمله الستات ... طبيخ، كنس، مسح، وغيره ... أنا حاقول لك إن فيه نوع تالت للخدمة، اللى هى إيه؟ خدمة الإجبار أو القهر، ... قلت بصوت مليان بالهوادة واللين: عندكم حق، فيه حاجه تانيه عاوزين تقولوها؟ قالت مراتى: لأ ... مش حاتكمل القرأة؟ قلت: كفايه دروس النهاردة ... قالت مراتى: يلا يابنتى سيبى أبوكى علشان يكمل شغله، وقاموا، وعند الباب وقفت إبنتى وقالت وهى تبتسم: بابا ... أعملك شاى؟ قلت وأنا أضحك: إمشى يابنت اللذين، ... أهو بنتى علمتنى درس جديد ... إن العلم هبه من ربنا سبحانه وتعالى ... مش مرتبط بسن معين أو مرتبط بنوع، رجل أو إمرأة ... قلت فى نفسى: قوم ياواد هات اللى كتبته، وشوف كلامهم ده حايوصلنا لإيه؟ لقيت فى أخر كلامى سؤال ... إزاى نخدم ربنا؟ بصيت للسؤال وراجعت كلامهم لقيت فى إختلاف، هم صحيح قربوا شوية من حل السؤال بس مكنش هو الحل ... أنا سؤالى واضح ... إزاى أخدم؟ مش هو إيه نوع الخدمة؟ ... يعنى المطلوب الكيفية مش النوعية،قمت جبت الكتب بتاعت الأماجد أسيادنا، وكتب مولانا الشيخ  أجمعين، قلت الواحد يبتدى بكلام شيخه لإنه إن ما وجدت الإجابة مباشرة، سوف تجد إشارة لها تدلك على مكانها فى كتب الأعلام، فتحت كتاب لمولانا الشيخ ، وبدأت أقرأ فى الصفحات الأولى، شدنى الحديث اللى بيقول (الناس هلكى إلا العالمون، والعالمون هلكى إلا العاملون)، ... وهكذا إلى أن يصل بنا الحديث الى نهايته، إفتكرت إنى كتبت هذا الحديث أو كتبت عنه فى مقالة من قبل، وتسمرت عند هذا الحديث طويلاً، حسيت إن الحل هنا ... بس فين؟ قرأته أكتر من مرة، وفى أخر مرة حسيت لمبة نورت فى دماغى، قلت لنفسى: هو ربنا كان سؤاله إيه؟ ... هل فيكم من عمل لى عمل قط؟ والخدمة يعنى إيه؟ الله! ما الخدمة نوع من العمل ... يبقى ياواد المقصود بخدمته أن تعمل عمل له، طيب إزاى أعمل عمل لله؟ قعدت أفكر وأسأل نفسى، إيه هو العمل اللى لله؟ ويعنى إيه لله؟ ما احنا كل حاجه بنعملها لله ... إيه الحاجه اللى تلخبط دى؟ تعبت من التفكير، قلت: ياواد إقرأ الفواتح، وإن شاء الله حاتوصل لحل، المهم ... بعد ماقرأت الفواتح، قعدت أقرأ الحديث تانى وتالت ... فجأة ... لاحظت إن ربنا عمل إمتحان للناس كلهم اللى نجح منهم العالمون، وبعدين عمل إمتحان للعالمون نجح منهم العاملون، وبعدين إمتحان تالت ... نجح فيه المخلصون ... طيب، وبعدين؟ ربنا سبحانه وتعالى قال بعد كده (والمخلصون هلكى إلا الموحدون، والموحدون على خطر عظيم)، ... الله الله ... إشمعنى الموحدون مش هلكى زى اللى قبل كده؟ لإنهم لما ربنا سأل الكل السؤال الأهم (هل فيكم من عمل عمل لى قط)، هم الفصيل الوحيد من الناس اللى نجحوا فى هذا الإمتحان ... علشان كده هم مش هلكى لإن كل عملهم لله ولوجهه الكريم ... فى واحد حايقرأ الكلام ده، ويقول فى نفسه: هو لازم يقول الموحدون هلكى، ماهو قال الأشد ... (على خطر عظيم)، ... أرد عليك وأقول لك: السؤال ده كان فى دماغى قبل كده، رحت سألت علشان أعرف إجابه لهذا السؤال، وده من باب اللى يسأل ما يتهشى، المهم لقيت إجابات كتير للسؤال لما تسمعهم أول مره تحس إنهم كل واحد فى إتجاه، لكن لما تفكر وتتمعن فيهم تلاقى تدرج مش إختلاف، فمن باب المفهوم اللى كان عندى إن الخطر ده هلاك كبير، شوف بقى لما يبقى خطر وعظيم ... حاقول اللى إتقال لى، قالوا: إن البليد لو سقط فى إمتحان مش حاتفرق معاه ... ليه؟ لإنه لا بيذاكر ولا بيبذل مجهود فى أى حاجة ... مش كده؟ إنما الشاطر لما يبقى قاعد يذاكر طول السنة، ويجى قبل الإمتحان يهمل فى درس، فى موضوع، فى جملة إعتقد إنها مش مهمة، ومش محتاجة مذاكرة أو مجهود ... يروح الإمتحان يلاقى معظم الإمتحان جاى من الدرس اللى أهمله ... علشان كده قالوا فى الأمثال: خل بالك ما بيوقعش إلا الشاطر ... وقالوا كمان: وقعة الشاطر بِألف، بلاش ده وده، إنت فاكر قصة بلعام بن بلعوراء، أيوه ... اللى راح يدعى على سيدنا موسى، وزى ما سمعت وقرأت إنه كان معاه الاسم الأعظم ... دى أقصر إجابة عن سؤالك، أما الإجابات الأخرى تحتاج من الكلام الكثير، ومن النقاش الوقت الطويل، وإيه رأيك فى جملتين اللغة العربية دول؟ المهم ... إن شاء الله المرة اللى جاية، نكمل موضوع الخدمة، والعمل، ونحاول نتحاور فى موضوع الإخلاص.

أحمد نور الدين عباس